ब्रेकिंग

विदेश

मदत वितरण केंद्राजवळ गोळीबार; ३६ पॅलेस्टिनी ठार

Samruddhi Dhayagude
12 Jun 2025

खान युनूस, (गाझा पट्टी) : गाझामध्ये मदत साहित्य वितरणाची वाट पाहणार्‍या पॅलेस्टिनींवर मंगळवारी रात्री पुन्हा हल्ला झाला. यामध्ये ३६ जणांचा मृत्यू झाला तर २०७ जण जखमी झाले. पॅलेस्टाईन आरोग्य मंत्रालयाने ही माहिती दिली. मदत वितरण सुरू होण्याच्या काही तास आधी मोठ्या संख्येने जमलेल्या पॅलेस्टिनी नागरिकांवर इस्रायली ड्रोनने मंगळवारी मध्यरात्री हल्ला केला. इस्रायली नाकेबंदी आणि २० महिन्यांच्या लष्करी मोहिमेमुळे गाझा दुष्काळाच्या उंबरठ्यावर पोहोचला आहे. इस्रायल आणि अमेरिकेच्या पाठिंब्याने आणि गाझा ह्युमॅनिटेरियन फाउंडेशनद्वारे चालवल्या जाणार्‍या मदत वितरण स्थळांजवळ इस्रायली सैन्याने केलेल्या गोळीबारात आतापर्यंत १६३ लोक ठार झाले आहेत आणि १,४९५ जण जखमी झाले आहेत.

अन्न मिळवण्याच्या आशेने सूर्योदयापूर्वी मदत केंद्रांवर गर्दी जमते. इस्रायली सैन्याने पुष्टी केली की, त्यांच्या सैन्याच्या दिशेने येणार्‍या संशयितांवर चेतावणी देऊन गोळ्या झाडल्या. सर्वसामान्य जनतेवर गोळ्या झाडल्या जात नाहीत. दरम्यान, गाझा शहरातील जाफा स्ट्रीटवरील एका इमारतीवर इस्रायली हवाई हल्ल्यात तीन पॅलेस्टिनी आपत्कालीन वैद्यकीय कर्मचारी ठार झाले. डॉक्टर त्याच इमारतीवर आधी झालेल्या हल्ल्याला प्रतिसाद देत असताना दुसरा हल्ला झाला. उत्तर गाझामध्ये दोन पुरुष आणि एका मुलाचा मृत्यू झाला आणि किमान १३० लोक जखमी झाले, असे अल-अवदा रुग्णालयाचे प्रवक्ते नादेर गारगौन यांनी सांगितले.